Lekeition 2012ko maiatzean sortu zen Ondare lantaldea. Beraiek eman digute
Uribarren kalea 6ko etxe jauregiaren datu historikoak.
Eraikina etxe jauregia da Jose Javier Uribarrenek (Lekeitio, 1791 — Paris,
1861) eta haren emazte Maria Jesus Agirrebengoak egina. Jose Javier Uribarren
bankari lekeitiarra Mexiko aldean merkatari ibili ondoren, 1826an Burdeos
aldean kokatu zen, eta geroago Parisen. Sarritan etortzen zen jaioterrira eta
bertoko alkate ere izan zen 1832-33an. Ganorazlko etxe bat behar zuela eta,
1831 n etxe bi eta lur zati bat erosi zituen eliza aurrean, herriko ingururik
ederrenean, Arteitatarren dorre zaharraren orubean. Diru ederrak ordaindu eta
gero, etxeok lurreratu eta ezagutzen dugun jauregia eraiki zuen, frantziar
estilokoa. Urte bete eskas behar izan zuen udako etxe hau amaitzen. Hala eta
guztiz ere, gaur egun oraindik gure artean daukagu, 180 urte beranduago!!!
Jose Mariano Laskurain (1792-1872) mutrikuarra izan zen arkitektoa.
Badakigu arkitekto honek Eliz Ateako eskola zaharra ere eraiki zuela sasoi
berean, 1831-32an. Eskola da Uribarrenek Lekeitioko herriari egin zion lehen
dohaintza.
Hori gutxi ez dela eta, Uribarrenek XIX. mendeko 50. hamarkadan, bere
negozioak Parisen zituela, Uribarren jauregia eraiki zuen hondartza gainean
lorategi eder batekin, gaur egun Uribarren parke publikoa dena. Bere emazteak
ez zuena ikusi, Isabel II.ak eta Zita enperatrizak gozatuko zuten. Jauregia,
zoritxarrez, argazkien bidez baino ez dugu ezagutzen, erre egin baitzen mende
azkenetan. Berriro eraiki, eta berriro erre zen jauregi hura, gaur egun Zita
Hotela dagoen tokian zegoena.
Lekeitioko Ondare lantaldea